ដោយ៖ គង់ហេង
កំពង់ចាម៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទថ្លែងថា ឆ្នាំ២០២៤ នេះប្រជាកសិករទូទាំងប្រទេស ផលិតស្រូវសរុបបានចំនួន ១៣លាន តោន បើទោះឆ្នាំបានជួបប្រទះបញ្ហាគ្រោះរាំងស្ងួតខ្លះ និងគ្រោះទឹកជំនន់ច្រើនលើកយ៉ាងណាក្តី។
ឯកឧត្តមរដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទថ្លែងបែបនេះ នៅចំពោះមុខឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងឯកឧត្តម អ៊ុន ចាន់ដា អភិបាលខេត្តកំពង់ចាម ព្រមទាំងមន្រ្តី និងអាជ្ញាធរពាក់ព័ន្ធ ដែលបានអញ្ជើញចូលរួមក្នុងពិធីចែកពូជស្រូវ ដល់ប្រជាពលរដ្ឋរងគ្រោះដោយទឹកជំនន់ទន្លេមេគង្គចំនួនជាង ៨០០ គ្រួសារ នៅស្រុកស្ទឹងត្រង់ កាលពីរសៀលថ្ងៃទី ២ វិច្ឆិកាកន្លងទៅនេះ។
ឯកឧត្តមរដ្ឋមន្រ្តីបានថ្លែងថា៖សម្តេចទាំងពីរ(សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត) បានឱ្យខាងកសិកម្មត្រៀមពូជស្រូវពីចម្ងាយរួចហើយ ដូច្នេះឆ្នាំនេះអត់ខ្វះពូជទេ។ ប៉ុន្តែចែកពូជស្រូវទាំងនេះវាធ្វើឱ្យស្មើនឹងការបាត់បង់ខូចទេ គឺប្រាដកជាមិនស្មើ ហើយ តែបានជួយសម្រាល ជីវភាពនៃការចំណាយរបស់បងប្អូន។
ឯកឧត្តមបានបន្ថែមថា៖ បើគិតទូទាំងប្រទេសឆ្នាំនេះ កសិករធ្វើស្រែបានច្រើន បើទោះជាជួបប្រទះបញ្ហាគ្រោះរាំងស្ងួតខ្លះ និងគ្រោះលិចទឹកជំនន់ចំនួនពីរក៏ដោយ គឹធ្វើស្រូវបានចំនួន ១៣លាន តោន ខណៈកាលពីឆ្នាំទៅ ២០២៣ បានចំនួន ១២លាន តោន លើសមួយលានតោន ដោយស្រូវមានទីផ្សារល្អ នាំឱ្យប្រជាកសិករសម្រុកដាំដំណាំស្រូវ បើទោះពួកគាត់(កសិករ)មានផ្ទៃដីតូចក៏ដោយ។
ឯកឧត្តមបានបន្តថា៖ ប៉ុន្តែខាងក្រសួងធនធាន និងឧតុនិយមបានប្រកាសប៉ាន់ប្រមាណរួចហើយថា រដូវប្រាំងឆ្នាំ២០២៥ ខាងមុខនេះ នឹងមានរយៈពេលវែងអូសបន្លាយ ដោយបានណែនាំកុំធ្វើស្រែលើស ប្រយ័ត្នអស់ចំណុះទឹកក្នុងស្តុក បណ្តាលឱ្យស្កកស្រូវ។ ជាពិសេសយើងព្យាយាមគេចពីបញ្ហាគ្រោះមហន្តរាយឱ្យបានច្រើន ទោះជាខូចខាតខ្លះមែនប៉ុន្តែនៅមិនប៉ះពាល់ដល់ថ្នាក់ គ្រោះទុរភិក្ស អត់ បាយ ដូចកាលសម័យមុននោះទេ៕
